شكرا مبارك ..... يسقط نظامك

شكرا مبارك ع العقود اللي قضيتها ف حكمنا
وبرضه شكرا ع العقود اللي مضيتها بإسمنا
حسابات بنوك أودعت فيها فلوس حرام من دمنا
وسبتنا واقفين طابور ع العيش بنقتل بعضنا
شكرا مبارك
شكرا مبارك ع الفساد اللي نهش في لحمنا
وتقول شفافية وكلام ورم نفوخنا وودننا
وحاشية من حبة لصوص باعوا وطننا وأرضنا
يطلعونا معاش مبكر وانت تحكم ميت سنة!!
شكرا مبارك
ف ديون كتير غرقتنا للأمريكان سلمتنا
بمعونة زلت نفسنا وياريتها وصلت شعبنا
ماوصلش منها الا الرصاص
وغاز يسيل دمعنا
شكرا مبارك
من شرم سينا حرمتنا وفاتحها لولاد عمنا
يبرطعوا خمرة وزنا والغاز هدية مننا !!
وأما فلسطين يصرخوا تقول حدودي آمنة
شكرا مبارك
سرطان مدمر ربعنا والباقي أمراض مزمنة
وعشان علاجك يتصرف يلففوك هنا و هنا
واما هتاخده تكتشف إنه هوا عبوه لنا !!
شكرا مبارك
خليتنا نكره بعضنا وهلال صليب فرقتنا
إعلام ضميره خصخصوه حسسنا إنك ربنا
وإن يوم فتحنا بقنا نبقى بنعلن كفرنا !!
شكرا مبارك
تعليم عقيم علمتنا يدفن ذكاءنا وحلمنا
خرج شباب يعمل دماغ ويعيش مغيب عننا
واما إنتفض أمنك رفض وبالرصاص قتلتنا
شكرا مبارك

تأليف/ د. عبادة محمد سعيد
مدرس أمراض الكبد والجهاز الهضمي
كلية طب بنها
ebadamsaid@yahoo.com